کودکخبر صدای بلند کودکان
کودکخبر، کابل: د لوګر په مرکز پورې د یو شمېر ښوونځیو ۳۰ نارینه ښوونکو ته د ماشومانو د حقونو د پېژندنې په تړاو درې ورځنی روزنیز ورکشاپ پیل شو.
یاد ورکشاپ د پوهنې ریاست د غوښتنې له مخې د بیسټ په نامه د پوهنې د یوې همکارې موسسې له خوا د درېیو ورځو لپاره په لاره اچول شوی دی.
په دې ورکشاپ کې ښوونکو ته د اسلام دین کې ماشومانو ته د ورکړل شویو حقونو، د ماشومانو د حقونو د کنوانسیون او ماشومانو ته د زده کړو او سالمې روزنې د زمینې برابرولو په برخو کې روزنه ورکول کېږي.
د لوګر د پوهنې ریاست د اسلامي زده کړو مرستیال مولوي خان زمان د یاد روزنیز پروګرام د پیل په مراسمو کې د ماشومانو پر حقونو خبرې وکړې او ویې ویل، چې د اسلام مقدس دین ماشومانو ته ډېر حقوق ورکړي او باید پر ځای شي.
هغه له یادو ښوونکو غوښتنه وکړه، چې له دې روزنې وروسته د ماشومانو د حقونو په اړه د زده کوونکو د والدینو شورا غړو ته د اسلام دین د احکامو په رڼا کې معلومات ورکړي.
د یادونې وړده چې د روان کال له پیله تر اوسه د لوګر د ښوونځیو ۲۸۲ تنه نور ښوونکي هم په یاده برخه کې روزنه تر لاسه کړې ده.
